ضيف العدد

العدد 215 - أيار 2003
تراب لبناني
إعداد: الياس خليل
قالوا إلي بتقول لبنانك غني مهد الحضارة ومورد العيش الهني
وبالكاد يطلع بالمساحة المعلنة نقطة تعجّب عالخريطة مبيّنة
جاوبت وبقلبي تصوّر موطني وصار التفاعل إنفعال بمعدني
غلطوا اللي قالوا مواطن الأرزة زغير هوّي زغر مخصوص تا تساعو الدني
عيب الحضارة الماشية بالورب يجني عليها حسابها الرقمي
وعيب الفنون تصير بنت الحرب وما يقابلوها الناس بالنقمة
برفض يكون الجهل نهج ودرب وإرخص أنا ويغلى طقمي
وبرفض بلقمة يشترينا الغرب ونحنا بلعنا العالم بلقمة
شمل المحبة في وطنا التمّ وحفظ الأمانة بينطلب منا
والشعب كلّو للوفاق انضم وإلاّ بإسم الحق ما غنّى
ولو نزلت علينا جبال الهمّ لا تخاف عا مجدك يا موطنا
عنا كرامة بتنشرى بالدّم لكن وطن للبيع ما عنّا
رجّعلنا لبنان يا ربّي إنسان أصلي بأصل إنساني
وردّ الأمومة الكانت تربي وما ترضع الأطفال بقناني
رد السما العم تدلف محبّة وعا كعبها مشلّش سنديانة
رد الجرن ومدقة الكبّة وبيت الوصالي بآخر الضيعة
يهرهر عا راسي تراب لبناني
يا جيشنا يا سياج لبنان المصون يا حكاية الإحساس بالقلب الحنون
إنت بغصون الأرز رمز الخالدين مطرح ما بتدق السما بأعلى الغصون
كنّا بسجون الطائفية مكبلين بإيمانك الجبّار حطّمت السجون
كنّا عيون مغمّضة عالمجرمين بلمعة صباح النور فتحت العيون
يا ما هزمنا من جيوش وفاتحين ويا ما بنينا من قلاع ومن حصون
من كل شلّة, وكل ملّة, وكل دين يا نكون أو ما نكون نحنا مخيّرين
نكاية بإسرائيل قررنا نكون
يا جيشنا بلبنان إنت مؤسسة عالتضحية قلعة شرفنا مؤسسة
بتعيش حتى بأرضنا يعيش الوفا وبتضل للأخلاق أعظم مدرسة
يا جيشنا يا مؤسسة بتحفظ عهود خدمت الجميع وما حدا منّا انظلم
عهدك شهادة وكل أعمالك شهود وعينك سهرها دفة الأمن استلم
بهنّي نشاطك بالصمود وبالجهود بهنّي الكتاب الخالد بهنّي القلم
حبّك علم لبلادنا ونحنا الجنود وكل الجنود بيحملو ذات العلم
طريق النصر بجفوني دلكتو ودفعت الدّم لبلادي ضريبة
ولما هالك جنوبي هلكتو طلع لبنان من حظي ونصيبي
نصحت إبني الملكني وما ملكتو عيش بأرض أهلك يا حبيبي
إذا درب السفر مرة سلكتو الحقيبة بتنحمل بالأيد لكن
ما فينا نحمل الارض بحقيبة
بحيي عماد بلادنا الرئبال غير الوفا ما أظهر وأضمر
بحيي كرامة مزنرة بحبال بتستقبل النسر الحلوالأسمر
لبنان بيت كبير للأجيال لكن على المحتل والمحتال
لبنان مختوم بشمع أحمر