ضيف العدد

وبعدني متل اللي هيكي كتير بتذكّر, والسما تغزل شتي على سطوح ضيعتنــا وتغزل حكي وأخبار بعيــوني... وكلما الوادي يعزف على منجيرة الريح غنية الرعيان, يصير الأدب يعزف على جفوني ترتيـلة صلا ضايعة من كتاب الزمان:
بـ بيتنا الباقي                                                        ع سطيحة الساقي

فراشات ومواعيد                                         وزهور وعناقيد

ع مخدتو القرميد                                                    بعد بتلاقي

بـ بيتنا في يوك                                                     شو عتاق فرشاتو

لون التعب مزروك                                                  بخيال درفاتو

وصندوق الجهازات

في حجة الرزقات

بيصرخ من الخشبات                                             عينك على وراقي...



وفي هون مرة ومتل الكأنو الليل شتوية, والناس برد وسهر وعيون عم تحكي, وعجقة كنكني وولاد عم يغفو مع آخر نفس من عمر جمر الموقدي, وبرّا الدني مراجيح عم تلعب, مزاريب بتغنّي, والريح مرقة ديب يرعد بصوتو, يخلي العتم يتزعفر من الخوف:

عشنا بزمان الولدني دراويش                                 والدلف يتدحرج ع فرشتنا

ع الخبز والزيتون كنا نعيش                         والناس تحسدنا ع عيشتنا

كان الشرف يفرض علينا فرض                              وما في حدا غبر ع سمعتنا

وبالمعول نجرح خدود الأرض                                والأرض تعطينا ع نيتنا


وبعدني كتير منيح بتذكر, وجدّي يسولف على القنديل حكايات فيها التعب بيدلّ ع الوفا للأرض وع عمر الناس... والدّلف يتدحرج على عامود هاك القنطرة, ودلف الشتي أهون بألف مرة من دلف البهدلي النازل ع راس جدي من عياط ستي, وملعون صوت الليل بيودّي... وهيك تصير السهرة فريقين: شي مع ستي وشي مع جدي, إلا أنا كون الفريق التالت, لا مع جدي ولا مع ستي, كون مع الحكي العم يدلف أدب... وهيك يصير الغضب لوحة أدب, والله يرحم عمي أسعد اللي كان يقول:

وبيت جدي متل برا ع الشتي              الدلف سقسق والأواعي تبللو

وستي تعيط يقلها جدي:اسكتي,             بس يهدا الطقس بطلع بحدلو

وع كتاف ستي الشال سحبة ميجنا            وجدي طفل قدام آهاتو انحنا

وع التنتنا كلما الهوا ترنح ومال               تغزل عيونو ع طراف التنتنا!


وهيك نغفى على لوحة “أدب القبو” ونوعى على لوحة “أدب الضيعة” ويبلّش مشوار “الأدب الشعبي”...

يوم الكنا ولاد زغار                  شو صلينا ت نكبر

وهلق لما صرنا كبار               عم نتندر ت نزغر

             مش قصت عمر ومشوار

                وحكاية عشق وختيار

القصة قصة حلم وطار              ولعبة غميضة وحجار

                  ونقفة غلي مش اكتر ....

وبعدن ببالي أهل هاك الدار, وهاك العجايز لِم يسهرو ويتكنكنو بحضن القبو, حد الموقدي ببيت ستي الإختيارة...
“زينب” مرا, جوزا هجرها وغاب, ومتل الكأنّو قال: قهّارة!
و”فيكتوريا” حلفت ع عمّا فقع ت يموت, لأنو ع هتلر سب بالحارة!
وعينك “فطينة” تشوف, المنشار حدّ لسانها مزحة ولد, وهيي بشرّ خبارها بتمسح بلد, وما بظن أنو حدا بالكون صادف بعمرو هيك ثرثارة!
وعمتي “إم فؤاد” مشيطني الشيطان بطباعا, ويمكن بنت عم إبليس وخلقت معو بنفس الوقت والساعة, ويمكن حماتو تكون, ويمكن إخت إمو بالرضاعة ووصلت على “النّوِرْك” أخبارا!!!
وخالتي “أم حسيب” بتحسد الأعمى على عصايتو, وبتشلّحو للطفل لهّايتو, لفظا كشن, طبعا خشن, بوجّا البشاعة ألف بربارة!
وكل اللي قالهن عنا المتل: “عندك مرا محتدي, ومرتدي ووشواشة مخدي, ع ذِمتي رح قول ع وسعا, هودي لـ”هندومة” غلق تسعا, اللي بتوزع مرورا ع المرارة!!!
وستي “لطيفة” من عمر جيل الوفا والخبز: “لقمة وحدي تكفّي تنين ولا خروف محشي بالدين”... وت تشتري لإبنها الكتاب, باعت بسعر الرخص إسوارة!
وجارتنا “نظيرة” تطبخ بحص لولادها ع العيد, وتقول: “الله يستر الفقر بالعافية ويزيد”, وتعجن شعير وقشّ, ويضحك لصبرا الحلو رغيف الخبز ع الكارة!!!
وستي “أم أنيس” عيشة هَنا عاشت بضيعتنا, اجتمعو ع معجنها الناس بالميات, تسعين سنة تقسم على جيرانها الأكلات, وعمرا ما زعلت يوم مع جارة, ومتل ما بيقول عمي حنا:

يا بيتنا يا زينة الحارة                                يا معمر من صخور جبارة

علواه تبقى متل ما كنت                           سقفك خشب والسطح حوارة

كان القمر ع سطيحتك سهران                     وتحت الشتي يعملك زيارة

والعنكبوت العاشق الحيطان                         يغزل ع بابك شغل سنارة



ومن سنّارة العنكبوت سافر على سنارة القلب وأوقع بشباك الحب... واشتقلها هاك الحبيبة اللي لابسي المريول, ونلعب أنا وهيي ورا الدوّارة ونتشقلب على غمر حمّيضا, نشوف العمر لوحات سحر وزنبقة بيضا... ونسرح بهاك المرج نحوّش حكي وأحلام وورود مخجولي, ومتل اللي بدنا قال نتخبّا, وع السر نعمل سرّ:

فكرت حالي سرت عم حبا           اشتلقت وكان الرد بالضحكي

ع السر تاري الحب متربى          واجمل حكي البيكون مش محكي

وما ضل عنا سر يتخبا                       مازال عنا عيون عم تحكي

مشّو سوا نرجع على لبنان... لبنان الأدب والحب... والله شو حلو يا لبنان: “متلك متل هالشمس”, ما الشمس ع قد وسع عينك بتشيل منها نور, ولبنان ع قد وسع قلبك بتشيل منّو ذكريات وحب...
لبنــان قبل الشجر هوي بشر, هــوي زند عمــلاق يعجــن صخر... لبنان هَمكـة عرس قانا الجليل, بلمـسة خيال الرب تصيـر نبيـد... لبنــان باب بالضيعة ينفتح لحالــو قبل ما تدق عليه, هَي عادة بــواب ضياعو خلقاني بلا قفــولي وبلا مفاتيح... لبنان هوّي صباح الخير يا جيران وهدهــدة صلا ومشـايخ ورهبان... لبنان واحد لطالمـا الله واحد والشمس وحدي والضمير واحد:

ولبنان ما بيكون يا اخوان                         الا وطن بيقدر الانسان

لبنان بالتقسيم ما بينقاس                       شقفة إلي وشقفة إلك يا فلان

الشجرة اذا قسمتها بتيباس                        وبيجوع للفية حلا البستان

الشفة ان قسمتا ما بقا بينباس                  خد الصبية الناعم الفتان

الخمرة اذا قسمتا بتنئذي بالكاس               ويمكن وجعها يكسر الفنجان

وما زال لا النسمة ولا الاحساس                  بيتقسموا ع العمر ع الأزمان

وما زال ما فينا نقسم الأقداس                  لبنان واحد متل الله وبس

لا بينقسم الله ولا لبنان ....


هالشّـي صحيح كتيـر, لأنــو الوطن إبداع: “إبـداع بالحب” و”إبداع بالأدب” ومن هالإبداعـين طلعو كل الحضارات الحلوي... ولطالما الأدب الشعبي بخيــر, لبنــان بألـف خيـر...