أخبار ونشاطات

نجدد الإخلاص للبنان

لمناسبة الأعياد المجيدة، وجّه قائد الجيش العماد جان قهوجي، كلمة إلى العسكريين عبر برنامج الجندي من الإذاعة اللبنانية ضمّنها تهنئة لهم ولأهلهم بالأعياد، واعدًا بأن القيادة لن تؤجل كل ما من شأنه تأمين العتاد اللازم ولن تنسى أعباءهم المعيشية، داعيًا إياهم إلى التعاون الدائم مع زملائهم في المؤسسات الأمنية والأصدقاء في قوات الأمم المتحدة.
هنا نص الكلمة:
«يا جنود جيشنا البواسل، يا رفاق السلاح
هيدي سنة جديدة منجدد فيها الإخلاص للبنان، والوفاء لدماء شهدائنا بالتضامن الكامل مع عائلاتهم وأهاليهم، خصوصًا بمناسبة الأعياد العزيزة على قلوب اللبنانيين جميعًا. بعرف أنو قسم كبير منكم رح يقضي ليلة العيد بالمركز، أو بتنفيذ دورية، أو بالسهر على الحدود، هيدي مش أول مرة بتعملوا هيك، العسكر ندر نفسه من البداية للوطن، والمواطن بيعرف هالشي، وبيسهر وبينام بأمان لأنو بيعرف إنكم سهرانين، عين على الجنوب وعين على الشمال، وبين التنين قلب الوطن منصان بجهودكم، وتعاون الناس معكم.
ما كانت السنة الماضية هينة، لا عليكم كمؤسسة، ولا على أهاليكم كمواطنين، ولا على المنطقة كلها، سواء من الناحية العملانية أو الاقتصادية، وكانت الأعباء كتيرة، والمهمات وحدة تلحق التانية، لكن النتيجة كانت النجاح الواضح بشهادة الأفراد والهيئات والدّول.
عيدية القيادة إلكم إن شاء الله بتكون بحجم تضحياتكم والآمال المبنية عليكم، مش رح نأجل أي خطوة من شأنها تأمين العتاد اللازم لوحداتكم المنتشرة بكل مكان، ومش رح ننسى الأعباء المعيشية اللي عايشين فيها الجميع، خصوصًا انتو، بظل انشغالكم بالمهمات الوطنية اللي بينفذها الجيش بسواعدكم وصدق مشاعركم، وبالتعاون الدائم مع زملائكم بالمؤسسات الأمنية، والأصدقاء بقوات الأمم المتحدة اللي بيعيدوا كمان معنا، بعيد عن عيلهم، بوطن بيحتضن كل المخلصين، وتنعاد عليكم وعلى عيلكم جميعًا».